സംസ്ഥാനത്ത് സ്വർണവില വീണ്ടും കുതിക്കുന്നു. പവന് ഇന്ന് 440 രൂപ കൂടി. 64,960 രൂപയിലാണ് ഇന്ന് വ്യാപാരം നടക്കുന്നത്. കഴിഞ്ഞ ദിവസം 64,520 രൂപയായിരുന്നു വില. ഗ്രാമിന് 55 രൂപ കൂടി വില 8,120 ആയി. ഉടൻ തന്നെ സ്വർണവില 65,000 കടക്കുമെന്നാണ് റിപ്പോർട്ടുകൾ.
അന്താരാഷ്ട്ര സ്വർണ വില 2944 ഡോളറും രൂപയുടെ വിനിമയ നിരക്ക് 87.10ഉം ആണ്. പണിക്കൂലിയടക്കം ഒരു പവൻ സ്വർണം വാങ്ങാൻ 70,000 രൂപയോളം നൽകേണ്ടി വരും. ഫെബ്രുവരി 11ന് പവൻ വില 64,000 കടന്നിരുന്നു. 20നാണ് പവൻ വില ചരിത്രത്തിലാദ്യമായി 64,500 കടന്നത്. 24 കാരറ്റിന് പവന് 70,864 രൂപയും ഗ്രാമിന് 8,858 രൂപയുമാണ് വില. 18 കാരറ്റിന് പവന് 53,152 രൂപയും ഗ്രാമിന് 6,644 രൂപയുമാണ് വില.
ജനുവരി 22നാണ് സ്വർണവില ആദ്യമായി 60,000 കടന്നത്. അന്താരാഷ്ട്ര വിപണിയിലെ മാറ്റങ്ങളും ട്രംപിന്റെ വ്യാപാരയുദ്ധവും താരിഫുമെല്ലാം രാജ്യത്തെ സ്വർണവിലയിൽ പ്രതിഫലിക്കുന്നുണ്ട്. സ്വർണത്തിന്റെ രാജ്യാന്തര വില, ഡോളർ – രൂപ വിനിമയ നിരക്ക്, ഇറക്കുമതി തീരുവ എന്നിവ അടിസ്ഥാനമാക്കിയാണ് സംസ്ഥാനത്ത് സ്വർണ വില നിർണയിക്കുന്നത്. വെള്ളിയ്ക്ക് ഗ്രാമിന് 110 രൂപയും കിലോഗ്രാമിന് 1,10,000 രൂപയുമാണ് വില.
