കൊച്ചി: അമൽനീരദ് സംവിധാനം നിർവഹിച്ച് പുറത്തിറങ്ങാനിരിക്കുന്ന ബൊഗയ്ൻവില്ല എന്ന ചിത്രത്തിലെ ഗാനത്തിനെതിരേ പരാതി നൽകി സിറോ മലബാർ സഭ . ക്രൈസ്തവ വിശ്വാസത്തെ വികലമാക്കുന്നതാണ് ചിത്രത്തിലെ ‘ഭൂലോകം സൃഷ്ടിച്ച കർത്താവിന് സ്തുതി’ എന്ന ഗാനമെന്നാണ് ആരോപണം. ഇത് സംബന്ധിച്ച് കേന്ദ്ര വാർത്താവിതരണ പ്രക്ഷേപണ മന്ത്രാലയത്തിനും സെൻട്രൽ ബോർഡ് ഓഫ് ഫിലിം സർട്ടിഫിക്കേഷനുമാണ് സിറോ മലബാർ സഭാ അൽമായ ഫോറം പരാതി നൽകിയിരിക്കുന്നത്.
പ്രൊമോ ഗാനമായ ‘സ്തുതി’ പുറത്തിറങ്ങി മണിക്കൂറുകൾക്കുള്ളിൽ വൺ മില്യണിലേറെ കാഴ്ചക്കാരെ നേടിയിരുന്നു. ‘സ്തുതി’ ഗാന രംഗത്തിൽ സുഷിൻ ശ്യാമും കുഞ്ചാക്കോ ബോബനും ജ്യോതിർമയിയുമാണ് എത്തുന്നത്. വിനായക് ശശികുമാറിൻറെ വരികൾക്ക് സുഷിൻ ശ്യാം ഈണം നൽകിയിരിക്കുന്ന സ്തുതി എന്ന ഗാനം ആലപിച്ചിരിക്കുന്നത് മേരി ആൻ അലക്സാണ്ടറും സുഷിൻ ശ്യാമും ചേർന്നാണ്
