തിരുവനന്തപുരം: സൂപ്പര്‍ ലീഗ് കേരള ഫുട്‌ബോളില്‍ തൃശൂര്‍ മാജിക് എഫ്‌സിയെ തകര്‍ത്ത് തിരുവനന്തപുരം കൊമ്പന്‍സ്. സ്വന്തം മൈതാനത്ത് നടന്ന മത്സരത്തില്‍ എതിരില്ലാത്ത രണ്ട് ഗോളുകള്‍ക്കായിരുന്നു കൊമ്പന്‍സിന്റെ ജയം. 16-ാം മിനിറ്റില്‍ വിഷ്ണു ടി.എം, 69-ാം മിനിറ്റില്‍ ലാല്‍മാംഗൈസംഗ എന്നിവരാണ് കൊമ്പന്‍സിനായി സ്‌കോര്‍ ചെയ്തത്.
കളിയിലുടനീളം ആധിപത്യം പുലര്‍ത്താന്‍ കൊമ്പന്‍സിനായി. 16-ാം മിനിറ്റില്‍ ബ്രസീല്‍ താരവും ക്യാപ്റ്റനുമായ പാട്രിക്ക് മോട്ടയുടെ ക്രോസില്‍ നിന്നായിരുന്നു വിഷ്ണുവിന്റെ ഹെഡര്‍ ഗോള്‍. 69-ാം മിനിറ്റില്‍ മോട്ടയെടുത്ത ഒരു ഫ്രീകിക്കാണ് രണ്ടാം ഗോളിന് വഴിവെച്ചത്. കിക്ക് പിടിച്ചെടുത്ത ലാല്‍മാംഗൈസംഗ പന്ത് അനായാസം വലയിലാക്കുകയായിരുന്നു. സീസണില്‍ കൊമ്പന്‍സിന്റെ ആദ്യ ജയമാണിത്.
